李彩華（Rain）日前往泰國布吉拍攝彭氏兄弟執導的新片《鬼域》，她坦言不敢喝當地的水，只喝可樂。Rain在當地機場看到貼滿尋找失蹤兒童的啟事時，感到十分心酸。
李彩華日前往泰國布吉逗留兩天，客串演出彭氏兄弟執導的電影《鬼域》，與鬼后李心潔大做對手戲。早前泰國大海嘯災情嚴重，Rain以為當地仍然一片愁雲慘霧，但抵埗後才發覺遊人如鯽。
Rain日前在將軍澳接受本報訪問時說：「我初頭諗住成班機得幾個人去，點知班機滿晒，機場勁多人，街上啲人又冇乜嘢喎，同我諗嘅都完全唔同，我只係唔敢飲嗰邊嘅水同食魚，只飲可樂同食薯條。」
直至完成拍攝後，Rain在當地機場準備乘飛機返港之際，才發現機場四處貼着尋找失蹤兒童的啟事，令她感到十分心酸，Rain說：「我第一次見到咁多尋人啟事，係成堆呀，全部都係搵失蹤嘅小朋友，睇見都覺得好慘。」Rain表示早前雖然在內地拍劇，但她得悉南亞海嘯災難時，亦有捐錢賑災，她說：「有時啲人會誤會香港好似有好多人搵笨，會呃人咁，其實每次一有啲災難，香港人都會好熱心，即刻幫手賑災，呢樣係好難得，好有愛心嘅表現。」
Rain主演的劇集《功夫足球》早前播映完畢，收視欠佳，她自言感到有點失望，幸另一套由她主演、正在播映的劇集《我師傅係黃飛鴻》收視不俗，Rain笑說：「呢套劇真係有幾多觀眾睇㗎，我媽咪去街市買餸，啲人嗌佢做桂蘭阿媽（Rain在劇中飾演莫桂蘭一角)，好搞笑，呢期媽咪喺街市好hit，做咗中環街市天后呀！」
採訪：朱倬誼
攝影：陳偉權
服裝：Kookai&SistyrMoon
