飯局上碰到Ｌ教授，佢十年前經常寫稿，刊登於報紙，自從教資會（ＵＧＣ）於梁錦松時代引入美國模式，啲大學教授publishorperish（出版或消失）之後，感到研究壓力大增，於是閉門教書、寫學術論文，唔再為報紙寫稿咯。左丁山唔識佢嗰科，唔知佢有乜論文發表，不問也罷，Ｌ教授話最新衡量教授表現嘅標準，唔再係論文數目與論文喺邊度發表（例如經濟學家在《AmericanEconomicReview》發表一篇論文，勝於在香港啲月刊寫一千篇），而係量度citation（被行家引用）次數，愈多就愈巴閉。Ｌ教授話：「自己勤寫論文，好希望有人引用！」
今時今日做教授好辛苦，唔似得左丁山讀書時代，一啲教授搬字上黑板，叫我哋抄筆記就掂，呢類溫故「支薪」、坐以「待幣」嘅方法，out晒咯，左丁山見過一啲教授不斷降級，最後出局，就係冇論文出版之故。Ｌ教授慨嘆話：「讀博士，辛苦；做教授，更辛苦。見到自己啲唔係咁叻嘅學生出到商界，十年後薪金水平已經高過自己，化晒，唔通𠵱家轉行咩。」
不過Ｌ教授亦嘆息學生畢業後，搵銀好辛苦，佢一位學生被派上北京，本來做董事助手，但因為捱得，來自內地，中文好極，董事逐漸減少上北京次數，在香港遙控，於是呢位學生一紮醒就返工，夜晚十一二點返到屋企就上床，不知外間為何物，父母在港好心痛，希望佢返番嚟拍拖結婚。但返嚟之後，係唔係一定可以搵到月薪三萬八加津貼嘅工呢？學生唔敢博，惟有死做。點解北京咁好生意呢？學生同教授講：「內地顧問機構收紅包寫估價報告，香港顧問夠專業，唔收枱底錢，所以受人歡迎，做唔切。內地唔貪污嘅話，我哋就唔夠人鬥價錢咯。」