劉德華前晚擔任《殘酷一叮》嘉賓評判，由選唱《習慣失戀》的小童莫凱謙勝出，他贏取七千一百元獎金後，即有多名女舞蹈員在他面前大跳肯肯舞助興，令他不知所措，華仔見狀不滿說：「好似迫啲細路仔去嗰啲世界。」
無綫節目《殘酷一叮》前晚在將軍澳電視廣播城錄影，請來劉德華做嘉賓評判，八隊參賽者中，以小朋友較受歡迎，最後勝出的是只有六、七歲的小朋友莫凱謙，他唱容祖兒的《習慣失戀》，唱了七十一秒，奪得七千一百元獎金。
劉德華問莫凱謙說：「你有冇拍過拖呀？知乜嘢叫失戀咩？」小朋友說：「咁男女分開咗，咪失戀囉！」華仔說：「梗係唔係啦，呢啲係分手唔係失戀，你咁細個，都唔知拍拖係乜，點解揀呢隻歌？」小朋友回答說：「都係唱吓歌玩吓啫！」華仔頓時語塞。
另外，一對十多歲的小妹妹葉慧欣和馬思韻組成Twins，並唱出Twins的《女人味》，兩人穿上短裙又唱又跳，又學Twins踢腿，華仔事後問兩人：「點解你哋嘅腳踢得咁低嘅？」兩人賣口乖說：「因為你太靚仔囉！」華仔不為所動，還說：「乜你哋咁細個咁渣㗎！」兩人又要華仔猜自己多少歲，華仔稱最憎估女仔的年齡，兩人於是告訴華仔是十五歲。
事後華仔接受訪問說：「呢個節目幾好玩，我提議佢哋可以搞多啲嘢，譬如搵人上嚟跳舞或者玩吓啦啦隊。我覺得俾人叮唔係最殘酷，最殘酷係小朋友贏咗之後，成隊姐姐着短裙圍住佢跳肯肯舞，搞到佢望又唔係唔望又唔係，我唔鍾意呢part，好似迫啲細路仔去嗰啲世界咁。」
採訪：楊潔雯 攝影：何國豪
