𠵱家香港電影巿道低迷，喺盜版同非法下載嘅影響下，好多電影公司都話要減產，港產片買少見少。有線電視節目部執行董事徐小明噚日宣布有線電視成立電影公司，同安樂影片計劃未來兩年製作二十部電影，更密鑼緊鼓籌備兩部國際大片，其中十五部電影製作成本超過三億港元。
徐小明預計年中就會開拍首部製作，演員會優先考慮屬於有線嘅藝員同事，至於會唔會因為錄用無綫合約藝人而有牴觸？徐小明話會考慮各方面問題，徐小明又話有部份理想嘅演員例如周潤發、古天樂、梁朝偉、劉德華同成龍亦係佢哋考慮起用嘅演員，但要完成劇本先再決定角色人選。
徐小明重話有線成立電影公司，對電視及電影製作都有優勢，佢預期製作推出巿場已經可以封咗蝕本門，獲得雙贏局面。
台灣女星徐熙娣（小S）同埋蔡康永主持嘅台灣電視節目《康熙來了》收視一直唔錯，兩位主持亦因為呢個節目愈嚟愈紅，尤其小S做親節目都好鬼搞笑出位，成日搞到啲藝人唔知點算好，令節目增加唔少娛樂性，所以小S𠵱家被喻為「女吳宗憲」。
第四階段嘅「2004電視節目欣賞指數調查」噚日公布結果，上年十月至十二月喺無綫、亞視同有線嘅電視節目中，亞視嘅《尋找他鄉的故事VI》排第一位，而收視強勁、黎姿（左）同佘詩曼主演嘅無綫電視劇《金枝慾孽》排第二位，第三位亦係無綫嘅《星期日檔案》，好少電視劇可以入到前十名，《金》重要排咁前嘅位置，認真厲害！
劉德華雖然喺舊年一口氣拍咗五部電影，其中《江湖》、《龍鳳鬥》同《魔幻廚房》都同時報咗名角逐今屆金像獎「最佳男主角」獎，但係都慘被踢出局。噚日有內地報章同金像獎主席文雋做咗電話訪問，佢回應話：「沒入圍可能是劉德華在港產片中的演出『技不如人』，所以在票選上並未顯出任何優勢。」
早排有報道話余文樂前度女友、「四葉女」唐詩詠，上個月中喺機場同一個貌似無綫新紮主持崔建邦嘅男仔熱吻，其實唐詩詠確實同崔建邦蜜運，因為早排馮仁昭個老友喺銅鑼灣百德新街見到佢兩個手拖手行街，聽聞唐詩詠重成日喺崔建邦嘅何文田屋企出入，睇嚟佢哋嘅感情幾穩定。
