恒指再跌40點，成交縮到159億元。有啲大藍籌冇乜點郁，但相關C輪則衰咗啲，即係溢價收縮，引伸波幅又係。急景殘年，交投會再減一減，無心戀戰者多過搏命者。唔落注冇得贏，但唔會輸，賭少幾鋪冇損失。
兗煤C輪4612：兗煤（1171）前日升0.30元，昨日再升0.30元，成交18.9球，大增9球。C輪12件，件件升，最多交投嘅係4612，有53.2球，金額接近14球，收26仙，升8%。如果睇好兗煤，4612最啱望多兩眼，隻輪5月尾夠鐘，溢價2.6%，槓桿率4.4倍（有效3.6倍），引伸波幅51.9%。另外，4581數據亦靚，4月中到期，輪價16.9仙，溢價2.5%，槓桿率6.8倍（有效5.3倍），引伸波幅42.4%，交投則較遜。
但數據相對較靚唔代表一定會升，都要睇埋正股走向。正股由芬佬睇場，好難估係升係跌。
聯通C輪4505：啱啱話完聯通（762）上完就落，落完又上，昨日又升番0.20元，收6.30元。聯通C輪4505巴閉，收16.5仙，升幅36%，唔算乾炒，有15球轉手，銀碼2.5球。咪高追，隻輪下月尾夠鐘，溢價10.6%，槓桿率38.2倍（有效12.1倍），引伸波幅35.5%。雖然槓桿率爆炸，但咁嘅壽命，咁嘅溢價唔值得。
東亞C輪：東亞（023）午間派成績表，晏晝見過23.40元，埋單價23.10元，升0.15元。4隻C輪，冇隻博得過。
正股派0.80元息，股價嘅3.5%，C輪嘅實際溢價，要打埋呢條數落去。
章盛