雖然經紀陳收到料友利控股（419）復牌有得炒，但結果小初斗零都賺唔到，真係有多少激氣。
友利收購保利華億傳媒後，噚日復牌，小初諗住跟入炒一轉，點知隻股一開市就高見9仙，較停牌前收市價4.7仙，升近1倍，小初自然唔夠膽高追，隻股雖然最高見過0.101元，高收0.10元，但炒家就算成功在低位買入，最多都係賺十個八巴仙，風險同回報不成正比。
另外，被監管當局質疑通告唔清唔楚的嘉華國際（173）同嘉華建材（027），噚日出咗張所謂澄清通告後，終於可以復牌，但小初睇完之後，都唔覺得同之前有乜嘢分別，講嚟講去都講唔出何時注入賭牌，似乎重係好初步。
難怪兩隻股份復牌要大跌，嘉建收6.80元，跌15.53％，至於阿媽嘉國收2.275，跌17.27%。經紀陳話，江湖又再傳注資一事事在必行，小初都係聽住先。
慕容小初