羅嘉良前年離開無綫後進軍內地拍劇，薪酬即作三級跳，賺個盤滿缽滿，故日前嘉良與同屬寰宇公司旗下的李彩華（Rain）和梁進一，齊齊揮筆寫大字，預祝大家雞年「發財冇走雞」！
羅嘉良前年離開無綫之前，身價為小生之冠，他在離巢後簽約寰宇娛樂，主力內地拍劇，發展亦十分順利，薪酬再作三級跳，難怪去年買車又買樓，所以嘉良也預祝大家雞年發財。
日前嘉良與同門的李彩華、梁進一於將軍澳接受本報訪問，三人一同寫大字，向來寫書法有一手的嘉良大筆一揮，親書「發財冇走雞」；至於Rain則在旁畫雞，梁進一就畫元寶、金錢。三人在寫大字時，還一邊屈起雙臂扮雞翼，一邊扮雞啼，十分搞笑。
問嘉良有何新年願望？他說：「希望賺錢節節上升，發財冇走雞，最緊要身體健康。」對於去年賺個盤滿缽滿，薪酬作三級跳一事，嘉良聞言只笑說：「都跳得幾好，舊年確係我入行以嚟搵得最多錢嘅一年。」
嘉良表示在內地發展不俗，故有計劃在內地投資，他說：「我想喺上海投資買樓，有好多人同我講過話浦東幾好，有得諗吓嘅，又有人叫我試吓喺上海買舖位，但做生意嘅嘢睇緣份，冇得急，有機會就考慮吓。」
嘉良又稱自小對書法甚有興趣，他亦鼓勵五歲大兒子練大字，他稱：「書法係我國嘅國粹，應該要學，而且係藝術，寫書法就好似練氣功一樣。我記得自己喺細個時，讀小學同中學都攞過書法獎，但𠵱家就冇乜時間寫書法。」
採訪：朱倬誼
攝影：陳偉權
服裝提供：SistyrMoon/Billabong
