過年趁熱鬧，可以蒲旺角，朗豪坊開幕冇耐，加上獨有數碼天幕，將會每日免費播兩次「龍的故事」，商場內重有中樂團混合HipHop表演。
龍的故事係講旺角過去、現在同未來，今日起至年三十晚，同埋年初三至年初五，每晚七點半同九點半播出。
朗豪坊商場同入面嘅UA戲院年終無休，初一初二照做生意，年三十晚重特別延長營業時間到凌晨兩點，大可以喺度同親朋戚友拜埋個早年。
據業主講，朗豪坊對開嘅一段砵蘭街，年三十晚八點至初一凌晨一點，會封閉做行人專區，方便遊人。
新春期間，喺朗豪坊買嘢滿三百蚊，就有福袋一個，內有賀年食品同禮品劵。
合和主席胡應湘，剛賣出私人持有嘅大坑嘉崙臺單位，成交價二千萬。由於位處低層，加上縮則，面積比樓上四房標準單位細，僅二千一呎，三房間隔，因此造價偏低，每呎九千三百六。單位由胡應湘同太太郭秀萍出任董事嘅公司持有，○一年四月，以千六萬買入，之後出租。區內代理估計，回報四厘七。
胡主席似乎對東半山物業情有獨鍾，除咗自住渣甸山白建時道二十五號大屋，跑馬地樂活道十二號、樓齡四十六年嘅老牌低密度豪宅，仍由合和持有收租。
發展商搵代理幫手賣樓，大勢所趨。恒基地產每年都會頒發金牌，畀促成最多成交嘅代理行，以作獎勵。
美聯同埋利嘉閣，去年代理恒基樓盤成績最好，分別取得甲組同乙組冠軍。
噚日由恒基地產主席李兆基（人稱四叔），同埋二公子李家誠，喺國金七十六樓總部頒獎。美聯集團主席黃建業，同埋利嘉閣大股東、亦係中原集團主席施永青，親自出席。
恒基樓賣得，包括西灣河嘉亨灣、大角嘴港灣豪庭，同埋中半山富滙豪庭等。恒基更送出三十萬畀利嘉閣，作為促銷嘉亨灣最多宗數嘅獎金。
舊年掀起商場拆售潮，大部份賣個滿堂紅，好似葵涌廣場「時尚坊」，七十二個舖火速沽清。
美聯工商舖行政總裁黃子華，噚日講番個場租情，佢話租出九成，租戶主要售賣時裝、飾物同潮流產品。回報一般有八厘，個別重超過十厘㖭，好似六號舖，一百一十二呎，賣價百六萬，月租萬四，回報十厘半。佢話，美記成立「租務特攻隊」，為業主提供一條龍服務。
青山公路一帶住宅，呢輪不斷有投資者掃貨。南豐小欖浪濤灣，剛有投資者斥近二千萬，買入最後一間獨立洋房，屋近三千呎，另八百呎花園。美記羅志強話，買家係廠家，住緊跑馬地區，喺同區揸住六件物業。
另外，美聯林振聲話，南豐嘅將軍澳南豐廣場，二座B複式單位，二千零五十呎，以七百五十三萬賣出，每呎接近三千七。
電郵地址：
