資金繼續外流，呢個係對沖基金畀大市嘅訊息，話到明佢哋要造淡，所以，短期大市嘅壓力唔會細，但淡友能否如願，重要睇有冇對手同佢哋硬碰。
大市噚日上晝個勢都幾弱，中午時恒指跌到13454，再跌123點，但低位有對手，午後行情又反彈，且一度倒升，收市恒指13555，跌22點，期指收13516，低水略為收窄。
淡友要造落，除調走資金，打擊市場信心外，重放出聲氣，話春節過後個市會大跌，到時13000點大關都守唔住。
不過，昨日同芬佬傾開，佢哋唔係睇得好淡，未來1個月會係上落市，整固完成後，新升浪可衝破14000大關，向高位推進。
零售業好景，零售股PE普遍都搶到好高，聯洲國際（048）相比就大落後，噚日股價有異動，高收1.62元，升8%，基金買盤頗為活躍，佢哋對聯洲情有獨鍾，且收集亦已有一段時日，今次出擊，看來志不在小。
聯洲噚日升勢成支大陽燭，一舉而衝破10日、20日、50日線同中期降軌阻力，且有大成交支持，確認升浪開展，初步在去年11月中的1.76元，高位會有阻力，但以量度升幅計，股價好大機會升見2字頭。
有大行噚日嘅報告就大力推介聯洲，12個月目標價係2.50元。05年度（5月底結算）預測盈利1.82億元，每股盈利15.14仙，以2.50元目標價計，PE只係16倍，相比國際同業造緊嘅16至26倍PE，重係處於偏低水平。大行重預測06年同07年度嘅盈利分別係2.49億元同2.93億元，每股盈利20.7仙同24.3仙，更加吸引。
聯洲經銷的品牌組合有48個，其中34個為集團所擁有，14個為世界性的獨家專利，早前有另一家大行出嘅報告，最令投資者感興趣的，係指聯洲的股價，完全未有反映所持有品牌的價值。
品牌有價，以國際同業的估值準則計，每個品牌的價值可大可小，由數千萬元至數億元不等。04年度結算，聯洲股東資金14.33億元，每股淨值1.22元，計入品牌價值，每股淨值可大幅上升到4至5元，基金現水平重大手吸納，必然有因。
郭兆誠