理想家居：<br>福氣洋溢紅噹噹之家

理想家居：
福氣洋溢紅噹噹之家

農曆新年即將來臨，以為將屋企布置到又金又紅咁好娘？大錯特錯！福字貼只係阿媽年代的迷信揮春？亦唔係噃！今日介紹的屋企具備晒以上兩個特質，但娘味點滴不沾。主人家李生李太一個愛黑一個愛紅，所以家居都以黑紅兩色做主調，配搭起來順眼舒服，趁住新春將至，夫婦倆順水推舟，將原本已紅噹噹的家貼滿福字揮春貼，極有新年氣氛。

記者：張銘恩攝影：陳陶鈞
設計公司：主題創作（25786118）

小檔案

地區：香港仔
面積：642呎
間隔：2房2廳
裝修費用：$0
訂做家具：約$80,000

十小時完工

鬼馬活潑的李太悄悄告訴筆者，一室統一四正居然沒有經過新裝修！她說一來無謂浪費新樓原有的裝修，二來又唔想住啲人有我有倒模一樣的示範單位，所以只要求設計師為他們度身訂做所有家具。最令人歎為觀止的，就是裝置家具當日只有兩位師傅，但全屋兩房兩廳所有家具居然只用了10小時就全部搞掂晒，頭搭尾一日已可即時入住。

■雖然不用裝修，但全屋家具都唔少，10小時竣工，不得不佩服兩位師傅。

格仔鏡變「壁報板」

李生李太去年10月剛結婚，起初全屋都以「囍」字做裝飾，及至聖誕節就改為聖誕布置，刻下雞年將至，一室布置則充滿喜氣洋洋的過年氣氛。在紅噹噹的飯廳裏，「恭喜發財」等傳統揮春當然唔少得，不過講到最主要的布置對象，則非牆壁上的一幅格仔鏡莫屬，李太說它就如這間屋的「壁報板」，好啱用嚟玩吓搞吓嘢，一格格玻璃「壁報板」之間，貼上大大隻紅底金「福」字，加上其他新春家具擺設，使全屋福氣洋溢。

■飯廳淺灰×紅色格仔的福字鏡最搶眼，設計大膽效果奇佳。

■可愛懷舊小鴨仔，後面的迷你福字利是封更Cutie，剛好夠放十蚊銀，是在喜帖街發現的。

■揮春已為客廳加添不少新春氣氛，更何況有埋劍蘭加木製象棋，傳統中不乏高雅。

■大門口貼上福字不出奇，連門框也圍上紅色絲帶，甚有心思。

家具瘦身細屋變大屋

為達到良好視覺效果，人要瘦身，原來家具都要，六百多呎的李宅不算大，如要地方更美觀實用，惟有逼家具瘦身，兼在細緻位上花多點心思，用點技巧將雜物瑕疵收起，令間屋睇落更整齊！問及李太至愛的地方，原來是全屋家具大部份都用了弧形邊位，她說自己經常亂衝亂撞，家具唔起角就無咁容易撞親；問李生同一問題時，李太就搶着說：「梗係我啦！」

■飯枱類似雞翼摺枱，兩邊可收起，增加空間。

■飯廳儲物櫃也比正常的薄，而且巧妙地與梳化扶手位連成水平線，偷空了的梳化扶手可放電線插頭等物件。

■書房的電腦枱設計流線型，亦比一般電腦枱纖薄慳位。

■薄身電視櫃將Plasma包到冚之餘，重可以收藏大量影碟唱片。

睡房加木箱做地台

李太大讚的還有主人房，因為設計師將整個睡房加建了與窗台成水平線的地台，藉此可善用窗台位置，將之成為床的延伸部份，令本來面積細小的主人房變得寬敞實用，亦令不甘平凡的李太可以擁有一個充滿特色的安樂窩。由於地台是由一個個木箱做成，她還笑說將來搬家可以全部帶走，唔使煩！

■地台全部是儲物箱，輕易滿足了雜物多多的兩位主人。

■其實大床就只是一塊厚厚的床褥，依窗而放，晚上可擁抱太平山夜景入睡。