由於內地股市持續創新低，近月屢次傳出中國證監會揸弗人會換人救市，去年底傳聞中證監主席尚福林過於保守，中央擬調重慶市市長黃奇帆取代其位，搞到黃市長要公開闢謠；之後市場改傳財政部副部長樓繼偉先至係熱門人選，同樣冇下文；呢兩日竟然進一步傳出，新人選係人稱大摩嘅摩根士丹利亞洲嘅董事總經理兼首席經濟家謝國忠！不過，有投資銀行界中人就話佢機會渺茫，皆因呢個位中國仍未「對外開放」。
謝國忠過去幾個月頻頻發表報告，就中國經濟前景、人民幣幣值同樓市等作出預測，經內地傳媒大量轉載，人氣急升，四十五歲嘅Andy謝國忠，雖然係上海人，並畢業於同濟大學路橋系，但喺內地人眼中則屬「海歸」派，因為佢係麻省理工學院經濟學博士，現時內地高官之中仍未有「海歸」擔正，而且Andy過往喺世銀、麥格里銀行及目前大摩所在職位，都只係同研究有關，相信佢亦冇興趣接呢個火棒，估計傳聞最後都只係得啖笑而已。
傳真︰2623-9278
電郵︰