友利控股（419）在停牌多時後，終於公布以5.5億銀收購曾經製作《臥虎藏龍》的北京保利華億傳媒文化。經紀陳話，江湖傳聞成班炒家摩拳擦掌，諗住做番場好戲。
友利去年底請咗前商台高層做董事，跟手就由聖誕節之前停牌到𠵱家，原來就係搞緊呢單deal，小初唔清楚電影業前景係咪咁正斗，但起碼保利個牌頭夠照，若果能夠吸引到大陸炒家落場，相信會加熱鬧。
友利停牌前收報4.7仙，既然有新聞配合復牌，或者可短炒一轉都未定。
另外，早排經紀黃提過的天虹紡織（2678），近排股價穩步上升，噚日又升4.55％，收1.15元，終於重返招股價水平，成交較之前活躍，成交金額981萬元。
經紀黃話，天虹近排好勤力，除咗帶證券界人士睇廠外，亦有證券行幫佢搞路演，證明勤力原來真係有回報。
慕容小初