立法會忠誠貫徹壽爺指示，繼續全力協助阿董查找不足，深入研討點樣更有效地反對官商勾結，同埋杜絕利益輸送問題！
資訊科技揸攤人鬍鬚曾，日前捱義氣發動護呔行動，向全港九大小中西報章，一稿九投，猛話數碼港冇利益輸送，點知因當時佢不在其位，解畫錯漏百出，結果老曾燒鬚，搞到要道歉收場！
好嘞，現時全港焦點，當堂集中晒喺西九龍──孖曾兩兄弟，拆得掂數碼港，西九龍又點拆呢？
據權威消息人士話，西九龍根本冇可能再撐落去，壽爺發火，單一投標名存實亡！最慘就係啱啱至話有一批文化人受到收買，個個轉口風大嗌支持單一投標（咦，乜唔係知識分子有獨立思考咩？唉，不過知識分子都要食飯㗎！），大講單一投標點點點好。若然中央再用對眼厲一厲，中央投標正式冚牌，咁西九龍呢塊田，耕開少少，就有好多人掟低把鋤頭，拍拍籮柚走咗去嘞！
雖然話○五年特區旺一個「曾」字──上有紅曾、中有煲曾、鬚曾，左方又有榮辱曾，再加多件假呔曾，雞年特區勢將出現「五曾玩港」嘅亂局，不過頭一炮，就係由煲呔同鬍鬚兩個，表演一場「雙曾報喜」，好似七十年代歌神許冠傑，同佢大佬許冠文，各自揸一個塑膠槌仔，你扑我一槌，我扑你一嘢咁對話：「邊個夠我威？」「你點威？」「我握手長達六秒，人生充滿歡笑！」「咁點算威！我重威！」「你又點威？」「我一稿九投，理佢堅定流！」「咁點算威，我重威！交代數碼港，特首冇唐唐，寶物沉歸底，摺埋九龍西！」
當日只係海關關長，咁都攬上身飛撲解畫，若然煲呔組班，政務司司長梗係鬍鬚仔莫屬！雙曾雞年報喜，呢Q先拔頭籌，其他幾隻，班都未組得成，好快啲加油嘞喂！
傳真︰2623-9278
電郵︰