美國著名雜誌《VanityFair》每年都會出一期荷李活特集，今年就安排喺下星期二推出。今次雜誌搵咗十位荷李活當時得令女星影封面，當中包括被睇好會憑《藝伎回憶錄》大放光芒嘅章子怡，佢亦係唯一一位有份入圍嘅華裔女星。
其他獲雜誌垂青嘅女星有提名奧斯卡影后嘅琦溫絲莉（KateWinslet）、提名女配角嘅卡塔布蘭切（CateBlanchett）、奧瑪花曼（UmaThurman）、施嘉莉祖安遜（ScarlettJohansson）同施安娜美娜（SiennaMiller）等。而繼女星特集後，雜誌會推出男星同政界人物特集。
此外，根據內地網站新浪網引述，奧斯卡官方網站已公布章子怡會擔任今屆奧斯卡頒獎嘉賓，報道重話答應頒獎嘅有兩位影后姬妮芙柏露（GwynethPaltrow）同荷爾芭莉（HalleBerry）。
陶喆噚日到港台接受訪問，佢今次嚟香港只逗留兩日宣傳新碟，而新碟入面有首《她的歌》（SongforAnita）係寫畀梅艷芳。原來梅姐生前曾講過好想同陶喆合作，於是陶喆就寫咗呢首歌畀梅姐，佢重話已託咗朋友拎佢張親筆簽名唱片拜祭梅姐。馮仁昭就希望梅姐在天之靈可以領略佢呢份心意啦。
張文慈簽番亞視之後嘅第一套劇集《爸爸兩邊走》收視理想，重話會添食，噚日成班亞視台前幕後人員就去咗佐敦金龍船慶功。林韋辰重話張文慈之前同佢講過收視有兩位數字佢就露兩點，搞到張文慈有啲尷尬，佢話：「諗番拍嗰陣都幾辛苦，天寒地凍又要跳海，不過辛苦都值得。」
《天下無賊》大導演馮小剛，即將開拍中國版《哈姆雷特》，今次馮小剛重會撮合一對新組合，而且有中、港、台、日四地紅星好似金城武同埋鞏俐。聽聞今次鞏俐喺套戲入面會做金城武個阿媽，聽落都幾新鮮。
劉德華前女友喻可欣之前推出《情海星空─我與劉德華》一書，惹起唔少是非，日前有內地消息指喻可欣同華仔呢段情史，將會改編成電影或電視劇，喻媽媽亦證實話：「有片商接觸，但可欣沒點頭。」問邊個演喻可欣時，佢話：「冬冬（可欣）常說大S（徐熙媛）個性跟她年輕時很像。」
「亞洲車神」陳雙全為咗紀念師兄柯受良生前嘅俠骨柔情，四十五歲嘅佢決定推出個人首張國語專輯《風起雲湧》。噚日陳雙全喺台灣第一次去錄音室，重喺現場示範飛車進門嘅神勇飛車特技，令到現場工作人員大開眼界。
