磯山沙也加尋找失散細妹？
肉彈Twins慶團圓

現年二十一歲嘅日本性感女星磯山沙也加，經常幫日本雜誌影寫真，而佢為最新一期《SABRA》雜誌拍攝寫真兼封面就大搞新意思，搵嚟同佢身形同外貌都差唔多嘅十八歲性感女星川村由紀惠，組成一隊「肉彈Twins」。

合作啱嘴形
同樣擁有一把烏黑頭髮兼驕人身材嘅磯山同川村，齊齊着上三點式泳衣，喺寫真內又攬又摸，非常出位。呢對肉彈Twins雖然係初次合作，但兩個人就好鬼啱嘴形，拍攝時玩得非常投入。除咗攝影師同fans覺得佢哋似樣之外，就連川村都話試過有一次行過便利店時，發現一本自己做封面嘅雜誌，川村𢱑晒頭，自己明明冇幫嗰本雜誌影相，點解會咁？睇真啲，原來封面女郎係磯山沙也加，真係似樣得出奇。

拍廣告倒米
另外，磯山近日獲得日本玩具商BANDAI邀請，為嚟緊四月七號推出嘅全新高達電視遊戲「機動戰士高達一年戰爭」拍攝廣告。不過，第一次拍廣告嘅磯山就唔多識做，佢竟然話自己其實冇乜睇過高達系列動畫，好彩磯山亦識得補鑊話佢阿哥係高達fans，可以拍到呢個廣告佢都覺得非常開心喎。