《真．女神轉生》系列絕對稱得上經典系列，但係實際上香港機迷肯花時間心機煲爆機嘅，始終佔好少數，主因除咗最好玩嘅仲魔交涉同合體等元素，港人難以理解外，超複雜3D迷宮同難纏敵人都係機迷放棄原因。開發商ATLUS為擴大Fans層面，偶會推出較為易玩嘅外傳，《DigitalDevilSaga》系列就係其中之一，由戰鬥系統到劇情推進，都屬單向、易明，就算新手玩家一樣可投入金子一馬嘅幻想世界。
記者：徐影龍
可算係《真．女神轉生》易玩版嘅《DigitalDevilSaga》系列（下簡《DDS》），筆者不諳日文仍可打爆機，呢點已經令唔少人加入嘗試行列。個人覺得《DDS》好玩之處，唔再係不停搵仲魔埋堆，而係自己變成數碼惡魔參戰，而當中嘅屬性相剋系統亦相當之好玩，計盡條數增加己方行動，又或施放相剋魔法去扣減敵方行動等，戰略味相當之重，毋須「死衝」等級過關咁悶。
今集改動地方好多，其中加入半人半魔嘅羅剎狀態就至為惡搞！皆因每逢接近太陽雜訊Max時，遇到戰鬥就有機會變成「人唔似人、鬼唔似鬼」嘅羅剎狀態，其攻擊力及會心一擊率會大幅跳升，中招者幾乎一擊斃命！缺點係唔可以用魔法、命中率及迴避率會降低。
兩新同伴入隊
上集《DDS》志在Sell系統同角色，故事交代近乎零，好多機迷喺網上猛咁嘈。幸好新嘅《DDS2》一開波已解開唔少謎題，如上集最終首領嘅身份、眾人嘅關係及Karma協會嘅背景等，廠方算係從善如流，不過若未玩過上集嘅機迷，開隻Game後淨係「一輪嘴」開場白同劇情交代，都幾悶㗎。
今集講到主角撒夫等人離開虛擬空間，返到真實世界後，發覺受黑太陽影響，喺地面嘅人類全部石化晒，跟手就係四出搵番關鍵女角Sera。Sera具有淨化魔性嘅能力，上集只係行行企企，到今集終於可以露兩手，變身數碼惡魔幫拖，其魔化後嘅外貌同攻擊方式，甚至面上新增嘅標記，都跟主角撒夫如出一轍，到底為何如此？為免洩露劇情，暫且賣個關子。另一新加同伴，就係反Karma協會組織頭領Roald，惡魔化後為雷屬性，雖然外形好鬼HellBoy加土偶，不過由物理到魔法攻擊，都有番咁上下勁，入隊後值得培育一番。
六角蜂巢曼斗羅
既然加入新人事，又點少得新作風呢？《DDS2》喺系統上亦作出唔少改動，最特別係技能成長系統曼斗羅，由直線式進級改為六角形蜂巢式，學識一種曼斗羅後，旁邊圍住嗰6個都會同時開啟，畀你揀其中一種嚟練。驟眼睇好似好複雜，其實玩落不難理解，而且比舊有直線「焗練」更為靈活。新手起初見咁多種曼斗羅，可能會唔知點揀邊樣練先好，筆者就推薦先學「食奴曼斗羅」，學成後嘅吞噬技可提升獲得嘅AP值，加快練成其他曼斗羅技能。之後可按該角色本身屬性嚟發展，如主角撒夫屬冰就練冰妖、Gale屬風就練龍王同飛天，最後偶爾兼顧物理方面嘅修羅、沙門等曼斗羅，切忌貪心乜都想學，相信可順利應付初期敵人，亦免卻浪費AP及時間落無謂曼斗羅度。
繼承爆機Save着數多
未喺介紹隻Game前，先講吓繼承上集Save嘅變更點。若玩家之前已打爆過第一集《DDS》嘅話，嚟到第二集NewGame度，就會問你是否繼承能力值。雖然唔會繼承上集學識嘅曼斗羅（筆者辛苦練成嘅唯一神就冇咗），不過會根據之前練成嘅曼斗羅數目而有提升若干能力值。以筆者上集練滿84種曼斗羅為例，就令第二集初期每項能力值足足提升一倍有多，如「力」就有成9（冇繼承只得4），總數加埋多咗成20個能力值，相等於升7次LV！
其他繼承變更點包括可選HardMode、按劇情獲得較特別嘅道具、話唔定重有專屬曼斗羅同隱藏大佬（傳聞會出現比人修羅更變態嘅敵人），不枉費筆者玩前作時花咗過百小時煲爆機，算係有啲回報。
新舊版記憶卡湊成一對
跟上集一樣，《DDS2》同期有款HORI推出嘅PS28MB記憶卡，今次以女主角Sera及其惡魔化後嘅Virnani為主題，包裝極之精美，有買上集撒夫版嘅話，今次一定走唔甩。最後順便刊登一個《DDS2》嘅攻略網站，收錄內容相當之豐富，由攻略路線、首領弱點到隱藏元素都有提及，更新速度頗為迅速，新舊玩家都值得睇睇。
售賣點：DreamStore（25753285）
地址：灣仔東方188商場256號舖
攻略網址：gamekouryaku.com/ddsaga2/
遊戲類型：RPG
對應機種：PS2
遊玩人數：1人
行貨售價：$448
開發商：ATLUS
(C)ATLUS2004,2005
SONYStyleHK
查詢電話：28931183