與經濟學大教授講扶貧，佢話自己小時候就係赤貧出身，唔止貧，重係負資產㖭，因為屋企做小生意失敗，欠下一筆債，父母馬死落地行，搏命做，就係為咗還債，還得嚟，一家就要捱麵包。大教授全憑讀書叻，攞到獎學金，否則根本冇法子留響學校。
後來大教授考到美國名校，無錢起行，佢心生一計，走去銀行借錢，唔知點解銀行竟然肯借畀佢，攞住筆錢，買咗張單程機票，餘錢交畀父母去還債，隻身走咗去美國，冇錢住宿舍，就去香港學生度「屈蛇」，出去做雜工?托餐，夜晚瞓衣櫃。後來安定少少，就與六七個同學夾份租屋。現今喺香港好出名嘅Ｗ教授與Ｙ主席等瞓房，大教授就瞓廳，朝行晚拆。
捱到金睛火眼，讀完大學，攞埋博士，返嚟香港，當然算係衣錦榮歸，但已沾上克勤克儉嘅習慣，絕對唔亂咁花錢，絕大部份收入都儲蓄起來，作退休之用。
所以講到扶貧，大教授好反對派錢，贊成提供教育機會。貧窮基層嘅父母，只要鼓勵子女讀書，未必冇希望，千祈唔好聽埋啲似是而非嘅傳言，以為自己條件不足，讀書一定唔夠有錢人家啲仔女砌。如果有錢仔女讀書一定係叻啲嘅話，邊度會出現「富無三代」呢句俗語吖，點會出現咁多白手興家嘅富豪吖。你去大學做吓調查，好少教授係富豪之子。左丁山捐過獎學金畀大學生，有幾位獎學金得主來函致謝時透露，佢哋屋企係綜援戶；左丁山十零年前請過一位女大學畢業生，在公屋成長，區內中學畢業，此女孩子醒目過人，𠵱家已經係美資大證券行嘅ＶＰ（副總裁），飛上枝頭變鳳凰，與貧窮說了再見。知識改變命運，扶貧應以灌輸知識，加強教育為主。