與水貨大亨袁仁祥去銅鑼灣間樓上舖睇展覽，場面冷清到冇人信，反應並不理想，搞手實在要繼續努力。同場巧遇本地藝術界猛男「筋肉創作人」，神采十足，外貌愈來愈似馬浚偉；一對胸肌隨着說話震盪：「嗯，05年我將會繼續好忙，忙於創作，好多朋友都期待我個展覽，等待我嘅作品。我話你聽，香港人終於衝出亞洲。」袁仁祥聽後竟發出兩聲冷笑：「哈！05年我都好忙，忙於撲水呀，大佬！香港有個國際機場，日日都可以衝出亞洲，唔使灰心喎，細佬！
「年關將至，更加要撲水過年喇，今年一開季，又係靠UnderCover食胡喇！重記唔記得上年？UC條溶解系列喺香港賣過滿堂紅，重好賣過日本，我舖頭貼住應采兒着溶解長Tee張剪報，記憶猶新。今年同時同地，大家排大隊落重注買晒UC新一季貨，暫時跑出係嗰條由碎布做成嘅頸帶，返到幾十條咋，唔使幾日就賣晒。驟眼睇呢條頸帶好似車房嗰啲爛布，但睇真啲又有今季UC個主題圖案，好好橋㗎！今年我哋水貨舖同代理擺晒希望落呢呢條Line度，希望佢生到金雞蛋。相反，9號仔比起上年會入少啲，話晒呢個牌子銀碼較大，壓住啲資金就頭痕。」祥哥說得甚有道理。
主持人：大食Jack
八卦熱報：[email protected]
■UC今季精選（左上角起順時針方向）：由碎布做成頸帶，勁好賣、爛鐵叉新Tee、《ALiCE》電影的餅乾圖案Tee、孖骷髏頭新Tee。
