打工仔與老闆：
地盤工友應保存工資紀錄

權哥：喂，亞成，啱啱出咗糧，不如去食餐好嘢？
亞成：我唔去喇，無心機呀。
權哥：點解呀？
亞成：我明明記得今個月開咗十七日工，但老細只係出十五日糧畀我咋。
權哥：咁你有冇同佢講呀？
亞成：梗係有，不過佢話我只係開咗十五日工，重畀埋佢做嗰啲紀錄我睇，嗰度淨係寫住我做咗十五日工咋。
權哥：咁點呀？你有冇畀番你自己mark嗰啲紀錄佢睇呀？
亞成：睇鬼睇馬咩！我自己都冇記低，邊諗到要自己寫低。

「冇紀錄得個拗字」
權哥：唔係咁講喇，我哋做建造業嘅，一個月可能喺幾個地盤、同唔同判頭做嘢，如果自己唔保存好出勤同工資紀錄，萬一發生誤會，無論你記錯或者老細搞錯，冇紀錄嘅話咪盞得個拗字。
亞成：咁又係，好似今次我都冇紀錄可以同老細對，咪惟有接受囉！不過我以後都係要自己做番紀錄先得嘞。
權哥：梗係，咁樣就醒嘞。其實勞工處特別為建造業僱員出版咗一本小冊子，叫做《建造業僱員須知》，裏面附有簡單易用嘅紀錄表格，方便我哋隨身攜帶使用。
亞成：咁我哋可以去邊度攞到呢啲小冊子呀？
權哥：你可以去勞工處勞資關係科嘅分區辦事處免費攞到，又或者上勞工處嘅網頁www.labour.gov.hk 下載。

本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電勞工處查詢。
查詢熱線：27171771
此熱線會由「1823政府熱線」職員接聽。
資料提供：勞工處勞資協商促進科

服務熱線
電2