錢係咪天跌落嚟，樹生出嚟㗎呢？哎呀，八方都係唔好亂講，萬一教壞細路點算！噚日公布嘅一項幼童理財調查話，原來有啲小朋友係唔知錢係喺邊度嚟嘅。調查發現，雖然大多數幼童相信父母要工作先賺到錢，但都有三成幼童認為錢係從提款機得嚟。
個調查重話，喺四至六歲嘅幼童中，原來近六成已經有零用錢，不過喺低收入家庭嘅小朋友，就只有五成有儲蓄習慣。所以呢，中銀香港最近就贊助成立「孩子天」兒童銀行，呢間銀行設喺香港專業教育學院入面，只要係中銀客戶就可以預約參觀。間兒童銀行係一間模擬嘅小型銀行，設備都幾齊全，包括服務櫃枱同保管箱，畀小朋友透過角色扮演同益智遊戲，培養正面同健康嘅理財觀念，大個咗就冇咁易俾人搵笨嘞。
（圖）中銀贊助成立「孩子天」兒童銀行，噚日一班小朋友舞獅慶祝，副總裁林炎南（中）主持點睛。
梁鑑章攝
傳真︰2623-9278
電郵︰