是日恒指高低波幅154點，最多跌過123點，埋單只跌22點。雖然猴年股市只係剩番3日半，市場活動家並未袖手，總成交仍達176億元，只係較前市減少6億元。年假在前，估計高位有回吐，低位有錢人入市，拉拉鋸鋸。
中企指數窩輪：國指成份股中石油（857）、中石化（386）、國壽（2628）雖然只係同時微升1格，但屬於重磅嘢，總共都拉高咗國指14.1點，計埋其他成份股進帳，國指總共升咗41點，升幅0.9%，跑贏紅指同恒指。
中企指數C輪主角係4545，P輪主角係4540。自然係4545升，升幅11%；4540跌，跌幅12%。4545喺4月尾到期，輪價9.9仙，溢價2.3%，槓桿率14.4倍（有效9.4倍），引伸波幅25.5%。4540喺3月尾夠鐘，輪價8.4仙，溢價1.1%，槓桿率14倍（有效10.6倍），引伸波幅20.6%。兩隻輪數據都啱睇。如果國企股再上，博回頭，低位買4540P輪。如果國企回落，博彈番上去，低位買4545C輪，炒吓即市無妨。
華晨C輪4646：華晨（1114）連升3日，依次升幅係5仙、7仙同埋4仙，收1.49元。成交最多嘅C輪4646，收12.1仙，升5.2%，3日升幅39%，是日成交8.2球，係掛牌3個月以來最多嘅，但用金額計都只係1球。
咪手多多追貨，除咗驚正股回頭之外，隻輪數據唔得靚，5月初到期，溢價19.5%，槓桿率12.3倍（有效5.2倍），引伸波幅60%，買唔落手。如果有人玩供求遊戲，冇得講。
澳元兌美元C輪3511：睇澳元兌美元繼續升番，買3511，5月到期，輪價29仙，溢價1.3%，槓桿率20.8倍（有效17.4倍），引伸波幅8.4%。
章盛