羅馬王子托迪忽然愛國，決定唔同Nike續約，正式結束八年賓主關係，轉用國貨diadora。托迪話先前有日本同其他國家嘅牌子斟過佢，最後都出於愛國而選擇返國貨。
查實Nike一早已經對佢不滿。舊年歐洲國家盃對丹麥賽後，王子批評Nike對鞋唔好着，但最衰嘅係後尾嗰篤口水，搞到形象差晒；當時經已激到Nike騰騰震，根本就唔想同王子續約。點解diadora要搵托迪？原因係國寶巴治奧舊年退休，下季又冇埋光頭球證哥連拿嘅情況下，拿拿臨要搵番個生招牌。而且diadora一路係羅馬隊嘅贊助商，正所謂近水樓台先得月，唔搵佢搵邊個喎？
diadora同托迪嘅合同寫明唔可以掂禁藥，一旦出現問題，就一個里拉都唔會畀佢。diadora太唔了解王子托迪嘞！佢雖然懵盛盛，但一路冇呢方面案底，diadora不如寫明不准吐痰重實際啲喇！
「吃不到的葡萄是酸的」？日前保真諾夫以轉會市場「標王」身份加盟費倫天拿，結果惹來巴勒莫會長森柏連尼嘅批評：「一千萬鎊？簡直係癲咗，佢（保真諾夫）係好唔錯，但係唔值囉！」之後重自己踢爆話：「我哋都係出七百零萬啫！」重唔係買唔到人，喺度奚落人？
阿根廷射手泰維斯轉會哥連泰斯餘波未了，該會大股東MSI公司涉嫌洗黑錢，巴西當局正調查，泰維斯嘅五年合約亦因此減少到三年。該公司總資金不過三百萬美金，邊嘔到二千萬美金買泰維斯？嗰筆轉會費係直接滙到阿根廷小保加個戶口，而間公司同阿巴莫域治有關！
周三意甲聯罕有地全部喺夜晚舉行，二、三月係意大利最凍嘅，分分鐘成零度以下。球員協會即時提出抗議，話喺咁嘅環境之下踢波，簡直係收買人命。不過佢哋都好識得以大局為重，話今次就咁算，下季重係咁就阿叔都冇面畀。我求驗客就認為足總咁無情，班球員使乜咁有義喎！
前晚英超阿仙奴對曼聯，係近期最精釆刺激嘅球賽。兩隊場上打得激烈，場外亦有火花；韋拉及堅尼兩位隊長，就喺賽前於球員更衣室通道用把口互相「開火」，以為落到場重有好戲睇，點知成場波兩位大哥都算係最冷靜最斯文嗰兩個。咁識得控制脾氣，班細嘅真係要學嘢喇。