這款只在新春前後出現的連葉甘笋仔，賣相特別，那束葉比甘笋還要長，據菜檔檔主表示，連葉甘笋仔，有好頭好尾兆頭，多數用作拜神，至少買一雙。另外，為方便起見，大家亦可以叫檔主代執一式有七款的樣樣齊，包括連葉甘笋仔、生菜、葱、蒜、韭菜、芫荽和中國芹菜，一束約$10。
慈菇 添丁寓意
慈菇又叫芽菇，有添丁之寓意，亦是新春前後至容易搵到。李時珍在《本草綱目》中有記載，慈菇一根生12子，即慈菇一根有12個果實；而事實上慈菇一根多者有15個，少者也不會少過6個。慈菇是水生的草本植物，大者如杏，小者如栗。其食法多，葷素皆宜，煮炒均可，簡單食法可燜腩肉，頗為香口。不過慈菇本身有種苦澀味，炒食時宜加入少少糖。
生菜 拜神必備
生菜有「生財」之意，新年大家都想發財自然要買來煮餸，除了食用之外，更是酬神同祭祖的必需品，新春前後，部份菜檔更可以搵到一種連根的生菜，用來拜神取其完整的意思，同蠔豉一齊煮，就是新年必備菜式之一「發財好市」！
蓮藕 夠襟擺
新春期間意頭蔬菜必有蓮藕份，因為傳統的全盒內通常都有糖蓮藕，蓮藕諧音有年年都有之意。蓮藕夠襟擺，放雪櫃可存放個多星期，即使街市在農曆新年休息，也不用擔心無餸煮飯。蓮藕可以配肉炒食，又可以煲湯，甚至配紅豆煮糖水，最宜新春食滯了飲用，有健胃消滯作用。
記者：陳冰麗
