證券界每逢農曆年尾，都好期待睇吓法資大經紀里昂嘅風水指數，里昂噚日終於揭盅，一如往年，佢哋幫城中名人指點迷津，預測來年運程。今年被選中嘅名人包括英國首相貝理雅、北韓領袖金正日、發哥周潤發，同國寶郭晶晶。
風水報告話，屬雞嘅郭晶晶今年犯太歲，但吉星會環繞屬雞的人，提供指引，尤其是佢哋嘅愛情生活。至於晶晶在新的一年，將會與舊情人田亮再度攜手，但今次係勇闖商界，兩人會在內地開設游泳學校及婚姻介紹所，而且成績驕人，吸引唔少中國奧運健兒參加，首年就有十萬個會員。踏出創業第一步後，晶晶重會搵埋NBA籃球明星姚明合作，開拓婚姻介紹業務嘅國際市場。除咗從商，晶晶不讓田亮專美，亦會投身娛樂圈，而且重係去荷李活拍動作片，至於會否成為新一代「邦女郎」尚未可料，但佢一流嘅跳水身手，肯定大派用場。
除咗亮晶晶，澳門概念股熱炒亦成為風水指數嘅話題。生肖屬羊嘅周潤發，在雞年將會應金正日邀請，拍攝亞洲版《占士邦》，更因此而惹上醜聞，要棄影從商。由於曾在電影《賭神》中飾演賭神，故佢就以此形象為澳門賭業協會出任代言人，繼而製作一系列教人賭術嘅DVD，開設九百個電話專線提供賽馬及六合彩貼士，每分鐘收費五十元，重由香港開賭術學校開到拉斯維加斯，最後將賭術學校包裝上市。
傳真︰2623-9278
電郵︰