資金流出香港，即時令港股大散，但之前已經積弱的澳門賭業股，就跌得更加慘烈，兩隻龍頭股新濠國際（200）同信德（242）分別跌8％和3.5％，其他投機味重的濠賭股，又點會跌得唔重呢？
結好（064）雖然冇話過染濠，但之前曾向多名包括大劉在內的大孖沙配股，炒過上5元，可是最近不但大股東減持，其他接貨的大孖沙據聞亦一早食胡，所以結好先至搞成咁。結好昨大跌23.56％，收1.33元。
反而早前結好幫大劉旗下的至祥置業（112）搞配售，至祥股價一直相當堅挺，噚日逆市上升7.96％，收1.90元。
經紀陳話，由於至祥向來貨疏，加上新股尚未出籠，股價自然有支持，但之後會如何，就真係各安天命。
至祥喺上月底公布配售5646萬股新股，每股0.95元，集資5364萬元，認購新股的投資者，家陣帳面賺咗成個開。
慕容小初