一年一度燕歸南，加拿大友人又回港度假，由於他從未踏足過神州大地，近近哋陪他走一轉深圳。
過羅湖橋時，他周圍望：「好似喺聖地牙哥過墨西哥咁。」
華燈已初上，四圍都是大型霓虹燈，友人貼實車窗張望：「咦？全部都係娛樂事業，乜共產主義係咁嘅咩？」
在羅湖購物城內見識翻版王國，沿途不停有人用手指「篤」友人的膊頭，「買唔買DVD？」「買唔買表？」「揑唔揑腳？」友人索性用背囊覆蓋全身，免得再被人篤。「呢啲係咪正版DVD嚟㗎？」友人問。「呢啲真係DVD嚟㗎！」某男子邊用手指篤友人邊答，儍問妙答。
吃雞煲及豬骨煲時，一名應該係食肆老闆嘅男人在身邊經過，一邊行一邊側頭單手掩一邊鼻孔擤鼻涕，完事後隨手執起鄰桌的枱布抹面，大家當堂停晒筷，友人說：「嘩老闆，幫襯你，唔好咁肉酸吖！」老闆答：「嘻嘻嘻，多謝幫襯，食多啲吖！」儍問妙答。
在大型商場「萬象城」內逛街，好些貨品的款式比香港的更新穎，「乜都有得賣，使鬼去香港咩啲人。」友人說。
在揼骨Megastore內消磨了近六個小時，友人只隆重地說了一個字：「抵！」
透過處男下海，初踏神州的友人的眼睛去看祖國，比自己去看，看得更多、更真，也更直接。
如無意外，下一站，北京！