由荷李活男星尊尼狄普（JohnnyDepp），同最受國人愛戴嘅英國女星琦溫絲莉（KateWinslet）主演嘅電影《小飛俠前傳之魔幻童心》安排喺賀歲檔上映，套戲重啱啱獲得今屆奧斯卡最佳電影等七項提名，而尊尼亦入圍最佳男主角提名，同《Ray》嘅占美霍士（JamieFoxx）以及《娛樂大亨》嘅里安納度狄卡比奧（LeonardoDiCaprio）等問鼎影帝。
尊尼喺《小》片入面扮演英國著名作家J.M.Barrie，偶然認識咗單親媽媽琦溫絲莉同佢四個仔，慢慢發展出一段融洽嘅關係，好似一家人咁。而呢位作家最鍾意扮鬼扮馬，成日扮海盜同班小朋友玩，諗嘢重天馬行空，見到幾個細路喺床上跳跳吓，就想像佢哋識飛，而小飛俠PeterPan就係咁樣慢慢孕育出嚟。
呢套充滿童心嘅電影，重有金像影帝德斯汀荷夫曼（DustinHoffman）同影后茱莉姬絲蒂（JulieChristie）演出，佢兩個非常專業，好似有一次德斯汀拍戲嘅時候搞到指尖成塊肉唔見咗，痛到飛起，但係佢都只係用嗎啡止痛繼續拍。而當拍緊喺琦溫絲莉屋企上演《小飛俠》舞台劇嗰一場戲時，做佢阿媽嘅茱莉臨場爆肚拍手掌，搞到幾個小朋友唔知點反應一臉愕然，但估唔到出嚟嘅效果就好自然。