每到新春前後，果檔都可以搵到這些連枝連葉的大葉桔。大葉桔主要來自大陸，食味就一般，都頗酸，而且多核，非人人喜歡，之不過因為它有枝有葉，取其好意頭，有大吉大利之意，年長一輩都會趁新春期間，買一些返去用作拜神之用。提醒大家，大葉桔一般貨源不多，見到的話，趁手入定貨都啱。
碌柚拜神買一對
碌柚諧音祿有，象徵有財祿之意思，愈碌愈有，亦是過節必備水果之一，用作拜神用的話，碌柚至少買兩個。現時果檔都可搵到這些大大個的廣西沙田柚。除拜神用之外，柚肉食味清甜，有健脾、消食、化痰作用。新春食得多煎炸肥膩物，食柚肉亦最適宜不過。加上柚都算襟擺，買多幾個返去作存貨，唔怕新春期間無水果食啦！
蕉蘋果佳節搶手
蕉有招財意思，蘋果則有平安的意思，新春期間兩者亦特別受歡迎。蕉分有大蕉、普通香蕉、牛奶蕉及皇帝蕉，論貴氣，當然以皇帝蕉取勝，其食味是眾多蕉中最為好食的。至於蘋果，又以美國華盛頓出產品質較佳，大大個，襟擺之餘，送禮又夠得體。正所謂「一日一蘋果，醫生遠離我。」經常食之，對腸胃重有調整作用。
記者：陳冰麗
