台資百利大山頂道八至十二號豪宅，經過近八年重建，工程終告完成，現樓示範單位，至噚日正式曝光，不過，現場仍然一片混亂，最掃興係未拆棚，遮住維港，大煞風景。
個盤由拆到起，雖然一波三折，其間甚至被債權銀行沒收，但由於地段得天獨厚，無損買家入市信心，短短幾個月，就賣出十一伙，套現近六億。聽講，多賣幾個，就夠還債，所以農曆年後會封盤。半數單位會出租，每呎五十至六十蚊，每年租金收入三千幾萬。
相信百利大都估唔到，個盤會起死回生，由爛尾兼幾近淪為銀主盤，變成每伙市值至少半億嘅新貴。咁大起大落，正好見證樓市過去七、八年，盛極而衰後復甦。
中國人傳統上會喺農曆新年求籤，雖然未到年初三，地點又唔係車公廟，不過，港置噚日喺畢架山一號嘅記者會，已經率先準備咗個特大籤筒，請埋位皇帝客串，合幾人之力，一齊求番支好籤。
負責求籤嘅兩位長實經理，郭子威同曹皎明，求到嘅全部都係好籤，雖然求出嚟嘅籤都有啲記認，不過，就嚟過年，意頭好，大家都咁開心。
港置連解籤都做到足，每一支籤，除咗代表一祝福語句外，重配有籤文。今次嘅籤文，再唔係難明嘅詩句，而係畢架山一號噚日要公布嘅優惠，同埋按揭詳情，都算幾有創意。三支籤分別係「金銀滿屋」、「財星拱照」同埋「如意吉祥」。三支籤中，有兩支都同錢有關，果然離唔開生意人本色。
豪宅市場擔當樓市火車頭角色，大額成交湧現，無疑為樓市注入強心針。中記成立嘅豪宅品牌StatelyHome，做咗唔少交易，個別更刷新紀錄。例如中半山BranksomeCrest，去年創出呎價二萬八新高，火炭晉名峰，錄得呎價萬三，均由呢個品牌員工促成。
中原陳永傑話，舊年全個集團營業額十八億，StatelyHome促成六億半，佔三成六。至於二十名生意逾千萬元主管中，十二席為該品牌主管。
港人為南亞海嘯災民籌款，活動仍未間斷，其中由大嶼山愉景灣城市業主委員會，同香港興業喺上月底合辦嘅「來自愉景灣的愛心與關懷——善心送南亞」慈善活動，吸引逾五百人參加，一共籌到超過二十萬。
當日嘅活動，除咗包括義載慈善日、愛心大步行同高爾夫球車環保扮靚比賽，重有唱歌同跳舞等表演。
香港興業執行董事何柏貞都有出席，佢話，啲善款會捐畀香港紅十字會。
另外，香港興業集團同員工，喺海嘯發生後幾日，由集團發起嘅籌款，合共籌得近一百萬。
地鐵公司旗下商場，揀選租客好嚴謹。為確保租客開業後嘅表現，地鐵有個「優質顧客服務計劃」獎，每個月頒獎畀啲表現出色嘅商戶。
揀選方法係搵人扮顧客，查吓啲商戶嘅服務水準。
美聯物業青衣城商場一樓嘅分行，舊年就連續兩個月攞獎，認真唔簡單。
聽講，呢間分行，舊年九月至開業，第二個月，就已經攞獎，十一月再下一城㖭。
青衣城共有逾五十間商舖，美聯物業喺呢個場內，共有兩間分行。
電郵地址：
