由羅傑承做老闆嘅BMA唱片公司簽咗周麗淇成為旗下藝人，重一簽簽十年，又請埋林珊珊返嚟做董事總經理，實行喺○五年大展拳腳。
係人都知林珊珊同鄭伊健係連體嬰，林珊珊去邊伊健就跟去邊，伊健上年啱啱同舊公司BMG簽番唱片合約，只係出過一隻碟，但佢都決定同林珊珊一齊過檔BMA，林珊珊重會帶埋細佬林曉峰一齊㖭，再加上一位喺日本學藝返嚟嘅女新人、同埋一隊加拿大華人band，到時BMA就人強馬壯，聽聞佢哋遲啲重會搞個大型記者會宣布呢件事。
周麗淇為咗同BMA合作，亦提早同馬偉豪解約，原來佢一心想加盟樂壇，一嘗做歌手嘅滋味。其實佢想做歌手一早就有迹可尋，之前佢拍廣告都試過唱主題曲，反應重都唔錯，增強咗佢唔少信心。
此外，同屬BMA嘅歌手關心妍（Jade）噚日接受商台嘅訪問，話自從自己入行後每年屋企都會放桃花，不過今年有紅火蟻出現，佢本來唔想擺桃花，點知阿媽一早已經訂咗，嗰日重放咗盆桔喺屋企，嚇到阿Jade死，佢話：「我梗係check吓盆桔有冇蟻，點知真係有喎，咁我咪即刻攞殺蟲水噴盆桔囉。」
鄭希怡（Yumiko）噚日出席喺尖沙嘴舉行嘅活動，Yumiko話：「每年農曆年嘅時候，啲同事就會對我特別熱情，因為又到派利是嘅時候，我今年都預咗五位數嘅利是錢，同埋我每年都會買桃花，因為我都想行吓桃花運，行桃花運人緣好啲，人都靚啲嘛！」
鄭融噚日到尖沙嘴宣傳電腦產品，重獲得五位數字嘅酬勞，佢又自爆今年會過一個肥年，原來佢一向都有儲蓄嘅習慣，上個月鄭融嘅媽咪為個女做結算嗰陣，發現個女嘅收入已經有近七位數字，自然喜出望外，所以鄭融都喺度計劃緊將啲儲蓄用嚟買股票，或者做其他投資。
黃宗澤擔正演出嘅無綫劇集《我師傅係黃飛鴻》上周平均收視有成三十點，成績算唔錯，黃宗澤話希望收視可以穩步上揚，佢更加誇下海口話如果大結局嘅平均收視達三十三點，喺嚟緊嘅農曆年會一嘗派利是嘅滋味，據馮仁昭所知，好多未結婚嘅藝人都有派利是畀工作人員嘅習慣，咁難得一年一次，大家又開心，都值得嘅。
麥浚龍（Juno）噚日喺中環接受新浪網訪問，重即席揮毫寫揮春，祝願新一年每位巿民都「人財兩得」。Juno話嚟緊個農曆年會到美國滑雪，但起程前會先同家人食團年飯，佢重話自己以往幾年嘅新春都要喺工作中度過，十分辛苦，所以今年好渴望有假期可以出埠，馮仁昭相信久逢甘露嘅Juno一定會好享受呢個春節假期！
