港股反彈，終於未能衝破13760阻力，噚日掉頭急挫，恒指一度大跌近200點，收市報13578，跌143點；升降指數亦轉弱，上升股（不計認股證）157隻，而下跌股則超過510隻，市場人心明顯轉虛，期指尾段更大插到低收，大低水63點。
外圍雖然造好，但港股就受到資金外流影響，止升回跌。淡友出到呢招，萬試萬靈。不過，暫時港股仍係上落市格局，升穿13760，有機會見一見14000點；至於13000點的關口，亦應有好強支持。
「濠」股再插，呢次汰弱留強，殺傷力都幾得人驚。股價升完就跌，跌完亦會再升；升幅大，調整幅度亦大，反之亦然。「濠」股仍係今年股市的一度主流，大跌之後隨時會勁升。
永恩國際（210）係內地零售股，亦係近期股價表現最強勢的中型股，噚日市勢雖大跌，但永恩收1.51元，只係微跌1仙，由1月初的低位1.10元起步，1個月內，升幅達40%。
Adidas已成功擊敗對手，爭取到北京2008年奧運會贊助商資格，永恩作為Adidas獨家內地代理，在市場競爭方面，將會成為最大的受惠者，估計在08年奧運前，集團可設立300個專門店和專櫃，而透過6至7個內地代理的網絡，銷售點更會高達1300個。
永恩主要在內地產銷鞋類製品，有原設計製造，亦有「達芙妮」的自家品牌，近年業績大進，主要係兩瓣業務都有出色表現，其中以中國市場為主的自家品牌業務發展更速，盈利已超越出口美國市場為主的原設計業務。
04年度（12月年結）的上半年，營業額8.4億元，升25%，獲利6603萬元，大升220%，每股盈利4.26仙，派中期息1.5仙。原設備生產及自有品牌業務佔總營業額比例分別為45%及55%，「達芙妮」期內營業額增59%，同店銷售增長5%。
集團佔50%的皮鞋特賣場「鞋柜」與內地家樂福簽約，發展速度比預期為快。自「鞋柜」去年5月推出後，已開店18家，計劃開30家。
04年度估計永恩盈利1.5億元，05年度可上升至1.8億元，每股盈利11.5仙，以PE15倍計，股價可上見1.70元。
郭兆誠