今屆英超聯雖然只係進行咗三分之二，但英國博彩公司PaddyPower就認為賽事經已完結，重提早派彩畀買車路士成為英超聯冠軍嘅人。
車路士雖然重有成十四場聯賽打（截至禮拜二），但PaddyPower覺得分別落後車仔十分同十一分嘅阿仙奴同曼聯冇可能會追到，所以喺禮拜一話提早派彩。之但係，由於佢哋規模上同威廉希爾或立博爭好遠，故此冇乜公信力，而且亦有人認為佢哋不過係想博宣傳；更何況，佢哋試過喺○二/○三球季揩嘢犯錯，提早派彩畀賣阿仙奴成聯賽冠軍嘅人，但結果曼聯後上贏得冠軍。
我求大俠嘅睇法同PaddyPower一樣。雖則阿仙奴同曼聯重有機會，但有睇過今屆英超聯嘅球迷，應該認同車仔打得的確好；除非佢哋之後嚴重失準兼啲主力傷晒，否則應該攞硬英超冠軍。有競爭先有進步，如果阿仙奴衞冕失敗，曼聯連續兩年失威，下屆就會更加努力，並簽多啲猛人返嚟同車仔鬥過；到頭來得益嘅，咪我哋呢班球迷。
德甲聯球會多蒙特負債成八千五百萬歐元，股價重由高峯十一蚊歐元跌到得𠵱家嘅二個八毫四，照理佢哋應該好等錢使，但就好有骨氣，拒絕讓一間性商店喺佢哋件波衫度賣廣告。我求大俠認為多蒙特咁做好啱，如果佢哋為少少錢而整臭自己個朵，到頭來只會得不償失。
講開德國波，科特布斯喺前晚場作客特雷斯登場德乙聯，雖則開波僅八分鐘就少踢一個，但最後都贏一比○，真係神奇到暈。德國低組別聯賽最近有假波疑雲，冇喺前晚幫特雷斯登落場嘅龍門基斯歷就認喺兩年前收過水；德乙聯啲波咁古靈精怪，球迷玩吓好，千祈咪瞓身呀！
據《新浪網》報道中國𠵱家有六百一十二個球員冇約或被掛牌出售，但當中得五十個搵到新工，換言之有近九成二嘅人可能要轉行。中國足球近一年多災多難，除咗國足喺世盃外出局，中超聯又冇咗西門子呢條大水喉射住；佢哋想好似日韓咁躋身世界列強行列，短時間內都唔使諗。
拜仁前鋒辛達告魯斯黑開有條路，加盟德甲後幾乎未好過，冇正選外重做埋「藥煲」，今季好難得好番，點知又傷番。喺上周日，佢細佬撞車死咗，告魯斯即時飛返巴拉圭處理後事。拜仁亦打電話畀佢話全隊都「撐硬」佢。有咁多人支持你，告魯斯千企咪灰心，明天會更好啊！