隔晚外圍市好，港股噚日則唔對路，恒指曾經散過199點，埋單唔見143點。藍籌C輪前日有勢，昨日全部跌突，波幅好厲害，例如新地（016）前日升0.50元，最熱門C輪4643升17%，新地昨日跌0.75元，隻輪則挫26%。做錯邊，左一巴右一巴輸到雞毛鴨血。重有4日半猴年股市埋年結，唔係搏命炒輪時候。
聯想C輪：跌市中，恒指成份股有得升嘅只有聯想（992）與裕元（551），分別進帳1.2%與0.3%。裕元係芬佬股，但完全冇窩輪掛牌。聯想則有8隻C輪上市，冇P輪。聯想係咁意升啲，C輪4650飛升42%，仙輪變化誇張，交投少（金額1萬大元）令輪價誇多一誇。隻輪5月夠鐘，輪價2.7仙，溢價42.5%，槓桿率78.7倍（唔使理「有效」），去到尾，好難唔作廢。然則，如果睇聯想續有反彈，有冇邊隻聯想C輪可以博吓？答案係冇。
聯通C輪：恒指成份股跌幅最大嘅，有地鐵（066）、長江基建（1038）與聯通（762），跌幅由3.7%至3.2%。地鐵有隻非標準C輪2296，長建1隻輪都冇，聯通則有11隻C輪而無P輪。聯通走勢反覆，上完就落，落完就上，如果再落，博回升，有冇C輪可買？勉強可以諗吓3698，7月到期，輪價53仙，溢價12.7%，槓桿率11.6倍（有效5.6倍），引伸波幅41.5%。
新地P輪：新地回落0.75元，熱門新地P輪4589急升17%，成交金額超過20球。呢件係睇淡新地做買賣嘅正路之選，數據唔錯。另1件3666昨日升得9.3%，亦啱睇淡新地者考慮，隻輪6月到期，輪價82仙，溢價3.9%，槓桿8.7倍（有效5.7倍），引伸波幅26.8%。
章盛