紅曾遠在委內瑞拉，掟低兩句說話，當堂好似吐咗口水，引致董團夥及特區口水界人士，紛紛執住把放大鏡，研究紅曾口水裏面有幾多維他命同礦物質！
紅曾話：「咁你日日要平反六四，結束一黨專政，又點樣溝通呢？」不過跟住紅曾又話：「香港係多元社會，有不同意見係正常」，咁要求平反六四，係一種言論及意見，基本法亦列明有集會自由，有邊一忽破壞咗「人和」？
至於「結束一黨專政」，亦唔同「結束共黨專政」。結束一黨專政，只係叫共黨唔好一個霸住成枱飯菜自己獨食（咁獨食顧住膽固醇）！而係開放反對黨，畀第啲政黨公平參選，由選民決定呢五年畀人哋食，過多五年，政府換屆，又可以畀番你食！
咁嘅不同意見都不容，點樣「社會多元化」？即是話係神係鬼都任由佢一把口講晒，呢啲咁嘅口水，愈研究，個人愈會黐線！
又例如，「天時，地利，人和」假呔曾等即時幫腔猛話民主派係破壞「人和」嘅禍首。咁八方又反問一聲，未經正式審判定罪嘅何偉途脫離虎口返港，啲土共赤左，個個喊打喊殺，左一句辭職，右一句「交代」，面目猙獰，痛打落水狗，點解主人紅曾唔喝令吓班惡犬，要維持吓和諧？
加埋天時地唔利，沙士之後，又紅火蟻，又腦膜炎，鑊鑊都在祖國發生！沙士經已全無通報機制，當日特區衞生處向廣東攞少少資料都冇，點樣「地利人和」？突然殺出隻腦膜炎又唔知係邊科，總之同呢啲騎呢地區為鄰，算你前世整定冤孽囉。
由冬冬至周一鱷，紛紛開聲，個個話「不會在市區大規模爆發」！楊永強炒魷，都係因為當日呢一句！累死三百條命，壽爺紅曾猛叫董團夥「總結經驗」，一有紅火蟻、腦膜炎，冬冬鱷鱷等人，好似張斷線CD，唱來唱去又係重複楊永強沙士當日斷正嗰一句！廢董又講過成立一個類似北京小湯山醫院嘅防疫檢疫中心，霎吓眼又兩年，個中心呢？
廢話連場，空話連篇，謊話連載，佢乜都啱，民主派香港人就乜都錯，摑老董重手，又要漏夜「澄清」，咁嘅低能亂局，幾時捱到二○四六？
傳真︰2623-9278
電郵︰