老董呢輪衰運未完，聽胡主席話查找不足，施政報告表演默書，又俾紅曾話佢「尚有不足」（個個記者親耳聽到未授權解釋前嘅版本）。老董梗係有周身不足啦，正當八方覺得中方對老董太苛刻，開始同情佢老人家之際，特區政府忽然夜媽媽十一點幾出稿，話記者「聽錯」啫，其實唔係咁講，八方一聽再次顛黑倒白，指鹿為馬，董政府真係此地冇銀，叫人點樣信服？
曾副主都話「有則改之」，如果冇咪咕一聲吞咗佢，做人虛懷啲好。所以唔怪得挺董保皇黨首領陳啟宗都頂佢唔順，叫老董做三零部隊，全冇政治智慧。講開挺董黨，佢哋嘅成員主要係老董競逐連任時拉雜成軍，包括梁振英、鄭維健、陳啟宗、胡應湘爵士同吳光正等，佢哋當年答應過，老董一旦受圍攻，佢哋會站出嚟護董，咁睇番過去兩年幾，最有義氣係胡爵士，不過當中方發火窒董，爵士都救唔到，至於呢班挺董派有乜目的，就要問佢哋先知喇。
傳真︰2623-9278
電郵︰