紅火蟻繼續蔓延！廖冬冬前日至話過冇擴散去社區，即時遭到掌摑，除大角嘴外，天水圍天恩邨又發現呢隻害人赤蟻！冬冬重犯楊永強沙士期間大錯，就係有理冇理講定唔會喺社區擴散，點知梗係事後就釀成大禍！
不止紅蟻有異動，中方嘅紅曾，亦出現講嘢騎呢不同版本！明明特區記者去到委內瑞拉，個個雙耳都聽實紅曾講：廢董雖有總結經驗，「但」仍有不足！唔通嗰晚全體特區記者齊齊見鬼？定係喺紅曾見港記茶敍現場，好似「歌聲魅影」咁，重有另一把聲音？
紅曾多多聲氣，見玩大咗，又要事後淡化補飛，驚死掌摑廢董落手太重！早知如此，何必當初，鬼叫大隻江當初亂咁揸手，眾裏尋他千百度，以為揸正嘅係一隻做得嘢嘅一把手，點知過咗七年，先至知係揸錯咗隻豬蹄！
好嘞，𠵱家又試玩過，老江冇手揸，變咗壽爺揸，於是就發生「澳門曾六秒事件」。有人治，冇法治，特區十年浩劫，卒之都搞到不治，連紅曾講句嘢，都要搞到倒瀉籮蟹，團夥漏夜發表聲明，講明「受權澄清」，即是今次唔係由廢董自把自為亂噏，而係紅曾講錯嘢，查找不足之後，自己改正錯誤！
咁邊句係真，邊句係假，邊個老實話，邊個胡說八道？特區紅火蟻為禍，有人話要「引進」食蟻獸，食蟻獸就可以將啲蟻一嘢lam盡，董班子所留低嘅爛攤，壽爺紅曾一個個訓政分斥，事後點樣揩抹都無法澄清！
「引進」食蟻獸，反智夾荒謬！成個珠三角，食蟻獸早已被廣東人食清光，放多兩隻喺天水圍，盞即時俾人活捉剝皮，割喉生劏！特區赤禍，由泳池紅蟲，至到紅火蟻，幾時先至完？
傳真︰2623-9278
電郵︰