華裔小姐冠軍李亞男、亞軍陳法拉、季軍楊文琪、友誼小姐陳影雯同美態傾城小姐徐子珊噚日分別到土瓜灣金至尊同埋銅鑼灣雪肌蘭護膚品公司領取獎品。李亞男獲價值九萬元嘅名表、陳法拉六萬、楊文琪三萬、陳影雯同徐子珊則得到四千元名表，之後五人喺雪肌蘭獲得共十萬元獎金同十萬元禮品。
上個禮拜六華姐選舉當晚，廣管局接獲八宗觀眾投訴指華姐泳衣太暴露，同埋似胸圍底褲，楊文琪同陳影雯當時都係着白色泳衣，但佢兩個都話唔覺得似內衣重力撐話冇問題，李亞男、陳法拉同徐子珊就認為當晚嘅泳衣好靚，徐子珊話：「我唔覺得泳衣有問題，八宗投訴好少啫，我諗係佢哋嘅個人感覺，整體我覺得OK。」
無綫就回應話泳衣設計係迎合今年嘅時裝潮流，無綫多謝觀眾嘅意見，會開會參考同作檢討。
採訪、攝影：馮美茵
張衛健噚日喺台灣宣傳劇集《功夫足球》時，fans專程去到同佢提早慶祝生日。張衛健俾傳媒追問結婚一事時，佢用國語好淡定話：「不急、不急」，最後拗不過媒體迫婚，佢話：「我和張茜感情穩定，兩個人都跑不掉，除了我媽媽之外，她也是我最愛和最愛我的女人，在我心中早就認定她是我老婆了！」
謝霆鋒噚日喺北京宣傳新專輯《黃．鋒》時，俾主持人驗證胸肌係真材實料之餘，重講話好懷念當年同朋友一齊去北京雍和宮上香。據知霆鋒嗰次係同前女友王菲一齊去，霆鋒咁講，係唔捨得王菲抑或係因為出碟，所以借王菲博吓宣傳呢？
許愿噚日喺銅鑼灣為新書《新愿成真》進行義賣賑災簽名會，好友張達明、林建明都有出席，但簽名人數就只有兩、三個。而許愿前妻李麗珍原本答應出席，但臨時甩底。另外，今次新書主要訪問藝人內心世界，當中亦包括珍姐的愛情觀，問許愿珍妹有冇介意時，佢話：「佢都唔會介意，佢睇過之後都滿意個效果。」
阮兆輝噚日接受港台訪問時，提到之前接到羅家英嘅電話，搵佢代演一套粵劇，但阮兆輝因為冇檔期而推咗，而當時家英哥冇透露自己患上癌症。阮兆輝重話喺家英哥徒弟口中，知道對方做咗手術之後已經冇大礙，重話呢個病係積勞成疾所致。
