喺1月份最後1個交易日，恒指再漲71點，全月埋單下跌508點。總成交165億元，多過上周五39億元，睇嚟買貨過年嘅人多過賣貨過年嘅人。唔少藍籌C輪，跑贏正股，溢價稍微上升，炒友信心大啲，造淡揸P輪呢個主意要暫時收番，除非個市升得太急。
中移動C輪3599：中移動（941）收24.45元，升0.30元。上月，中移動有成5-6次上到24.60/24.70元即告無力而回頭，睇住，今回有機會破位而上，吼定C輪買。
正路對象3599，7月到期，輪價12.2仙，溢價7.6%，槓桿率20倍（有效9.1倍），引伸波幅24.6倍。隻輪發行量385球，街貨只有1成1，而成交量則有183球，代表好多炒即日鮮，1日炒幾轉搵食。
另1隻刺激性低少少嘅對象係3608，好長壽，年底到期，輪價13.8仙，溢價11.5%，槓桿率17.7倍（有效7.5倍），引伸波幅22.1%。
國壽C輪4681：李超人將國壽（2628）啲原始股出售，國壽收5.20元，跌0.15元，正股跌幅唔算好大，但啲大槓桿率嘅國壽C輪，則跌到反肚，跌幅25%以上者有13件。炒輪唔順手，撞啱不利新聞，可以輸到人仰馬翻。
上次鄭裕彤出售國壽，國壽跌過一輪又升番。今次，國壽若再跌，或者喺低位捱一輪，可以趁低撈國壽C輪，對象係4681，隻輪7月初到期，輪價40.5仙，溢價7.8%，槓桿率12.8倍（有效7倍），引伸波幅29.6%。溢價超過20%嘅國壽C輪，咪搞。
章盛