中電信噚日宣布委任翁順來為公司嘅助理財務總監、合資格會計師兼聯席公司秘書，由今日起生效。大家可能唔係好熟識佢，但佢老細王曉初就應該廣為人知。翁順來喺中移動九七年上市後，就一直擔任中移動嘅公司秘書及助理財務總監，追隨中移動前董事長王曉初多年，𠵱家王曉初轉至中電信出任董事長，佢亦繼續追隨。
點解咁得王總器重？原來翁氏出身畢馬威，係香港會計師公會資深會員、英國特許公認會計師公會資深會員同埋澳洲註冊會計師，有近二十年上市公司嘅審計、公司秘書及高級財務管理經驗，當年喺澳洲居住時，亦曾喺當地打過工，有海外經驗。翁氏過往喺中移動除擔任公司秘書外，主要負責傳媒及投資者關係，估計過檔到中電信後亦會致力提高中電信嘅透明度。
傳真︰2623-9278
電郵︰