周汶錡早前往夏威夷一星期拍攝時裝專輯，每天五時起床，又要穿上薄紗春裝到火山吹風，被大風吹到流眼淚，雖然比預期辛苦，但當地美景令她回味無窮。
名模周汶錡（Kathy）近期忙得不可開交，早前更飛赴夏威夷，為台灣雜誌拍攝時裝專輯。Kathy在著名的Maui島拍照，穿上LouisVuitton、Celine、Blumarine、Loewe等名牌的春夏新裝，以陽光、海灘、椰林樹影為背景。
Kathy回味地說：「第一次去夏威夷，真係好開心，去到沙灘見到水清沙幼，好似畫咁，真係好靚！」她此行逗留了一星期，更要瞓在沙灘上，比預期辛苦，她說：「影咗四日相，每朝都要清晨五點起身化妝，因為嗰邊開始凍，一定要靠陽光曬住先夠暖，先有氣氛。本來有一輯重要坐兩個鐘頭車，上三千幾呎嘅火山影，不過去到好大風，吹到我成個人歪晒，不停流眼淚，最終惟有放棄。」
夏威夷人出名熱情奔放，問Kathy可有豔遇？她說：「冇㗎，間唔中都有啲美國男仔行埋嚟叫我影相，不過人哋見你做緊嘢，都唔會追住你啦，點會有豔遇？最好傾就係有個滑水教練，幾型又好傾，其實我都好想學滑浪，不過冇時間，惟有揸塊滑浪板扮吓影相。」
採訪：DebbieLum
