第三十二屆動畫電影頒獎禮（AnnieAwards）前日喺加州舉行，由迪士尼同彼思動畫公司聯手製作嘅電影《超人特工隊》，喺頒獎禮以大熱姿態擊敗夢工場動畫《鯊膽大話王》同《史力加2》，囊括咗包括「最佳電影」共十項大獎，睇嚟今屆奧斯卡嘅「最佳動畫電影」都應該冇走雞喇啩！
後日就喺香港上映嘅《超人特工隊》，喺頒獎禮掃走十個為動畫電影而設嘅大獎，除咗「最佳電影」、「最佳導演」、「最佳編劇」等之外，連製作設計、人物造型、人物設計、動畫效果同電影故事等獎項都全部攞晒，其中《超》片嘅導演畢布特（BradBird）以聲演「E夫人」嘅生鬼表現，擊敗《史力加2》裏面由安東尼奧班達拉斯（AntonioBanderas）聲演嘅貓劍客，攞咗「最佳聲音演繹」，真係威到盡。
上年迪士尼電影《海底奇兵》喺同一頒獎禮上攞到九個獎，最後順利攞埋奧斯卡，照慣例嚟睇，《超》片攞到十個大獎，順勢攞埋金像獎嘅機會可以話係高唱入雲。
另外，喺電視獎項方面，大受兒童觀迎嘅《SpongeBobSquarePants》奪得「最佳電視動畫」，而布坦妮梅菲（BrittanyMurphy）亦憑電視卡通《KingoftheHill》嘅出色表現，得到電視類別嘅「最佳聲音演繹」。