網球手曉域治噚日喺澳洲公開賽決賽輸咗畀俄羅斯「靚仔」沙芬之後，立即向蜜運只得兩個月嘅澳洲電視台姐仔女友卡韋芝求婚，呢宗新聞睇怕都係○五年國際網壇最大嘅喜訊！
聽傳媒爆料，曉域治喺決賽後前往一個私人派對之前，送上大粒鑽戒向女友跪地求婚，甜到漏嘅卡韋芝當然驚喜答允。
其實曉域治同前女友史施達絲三個月前先分手，雖然佢同卡韋芝五年前已經相識，但兩個人拍拖只係好短時間，咁快就訂婚真係好意外；唔通呢位二十三歲球手要用喜事沖淡自己錯失成為近三十年嚟首位澳洲球手贏取澳洲公開賽男單桂冠嘅失意？又或者要用一段新感情治療舊創傷？又或者希望喺舊女友二月傷癒復出之前以訂婚示威？不過無論如何，我求大俠都祝福曉域治同卡韋芝永遠恩恩愛愛。
日前，車路士先公布赤字達到十二億港元，重話要喺○九/一○年度達到收支平衡。點知嗰頭講完，呢頭摩連奴禮拜日就去咗米蘭同阿祖安奴密密斟，單嘢如果真係傾得成，又要使四千萬歐元以上。鬼叫阿巴莫域治個西伯利亞油田長「泵」長有咩，其他球會唔恨得咁多！
舒夫真高養傷對AC米蘭嚟講梗係噩夢，但亦解決咗AC同烏克蘭國家隊嘅糾紛。話說烏克蘭教頭布洛堅講明如果AC唔肯畀舒夫真高踢下周三作客對阿爾巴尼亞場世盃外圍賽，就告上國際足協。阿Q啲諗，喺呢個關係咁「僵」嘅環境下舒夫真高受傷，總算解決咗場外交風波。
前萄萄牙國腳後衞沙維亞近日去咗羅馬試腳，據講羅馬教練迪尼利初步幾滿意，重話沙維亞抵得諗，無咩要求。梗係啦，沙維亞之前試過好幾間球會，包括修咸頓同埋布力般，都未被錄用，堪稱「試腳人球」，重邊有資格有要求？話時話，佢周圍試腳，唔知有冇車馬費呢？
噚日木狼主場爆冷慘負傷兵滿營嘅帝王，賽後主隊教練桑達斯就踢爆班球員夜晚掛住「蒲」，打早場就腳軟；所以喺呢場下晝兩點半嘅比賽打到一無是處。佢重話若果唔識自律，就會好似對大學球員咁鎖佢哋係酒店。咁又係，木狼嚟緊九個禮拜日會打六次早波，輸晒就慘咯！
逢周一至周五見報