猴年將盡，回望甲申年，最不利香港嘅顏色一定係紅色。先有開埠以來聞所未聞嘅紅蟲事件，邊個諗到泳池會有蟲，搞到署長大出洋相；之後就有紅灣事件，政府有意無意明益地產商（𠵱家叫利益輸送），幾乎拆樓拆埋老孫頂烏紗。
到咗歲晚，又有紅火蟻靜悄悄登陸特區嘅頭條新聞，發展到噚日，已發現及已摧毀嘅蟻丘共有二百八十二個，殺蟻無數，但係紅火蟻原來已經進駐民居，連煲呔管轄嘅西九亦出現蟻蹤，遲吓睇怕嘉慧園都會有所發現。追溯源頭，八方相信早喺五十萬港人上街反對23條時，大群「紅火蟻」已經分海陸空三路進駐香港，只係港人懵然不知耳。
至於阿董，經歷紅蟲紅灣紅火蟻三劫後，重要被紅哥（曾慶紅）千里發功，叫佢「有則改之」，呢四個字都好難頂。好彩周五就立春，希望到時乙酉隻雞一出，乜嘢紅蟲、紅火蟻都啄晒落肚啦。
傳真︰2623-9278
電郵︰