渣打新任香港區行政總裁蘇利民（PeterSullivan）會喺香港度過佢第一個農曆新年，佢話會入鄉隨俗派利是，至於派幾多，就唔講住。噚日佢就同香港市民拜個早年，希望香港經歷咗長達五、六年嘅通縮後，新一年經濟會更繁榮。
佢又介紹二月二十七日舉行嘅渣打馬拉松盛事，今屆有三萬人參賽，再破歷年新高，記得賽事喺九七年首次舉辦時，只有一千人參加。而由於太受歡迎，人數已經達到賽道極限，明年如果要畀更多人士參加，就要另覓賽道。
𠵱家嘅賽道係由尖沙嘴彌敦道出發，到西九龍公路，沿途經過青葵公路、長青隧道、青嶼幹線，喺汀九橋折返，穿過西隧、直闖港島中區，喺灣仔金紫荊廣場衝線。
（圖）渣打新任行政總裁蘇利民（右三）話，今屆馬拉松參加人數又創新高。
梁鑑章攝
傳真︰2623-9278
電郵︰