趙飛雲噚日同大行老友入馬場睇港澳盃，大行老友睇好澳門馬「搖滾小子」，結果輸完濠賭股再輸澳門馬，趙飛雲雖捧港隊場，但就射漏西洋仔告東尼隻「喜蓮戰略」，同大行老友殊途同歸──輸錢收場。
去年港澳盃主客兩場賽事，港隊人馬皆失利，結果澳門上上下下威足1年，今年香港人馬先奪頭彩，相信最開心都係董特首，起碼暫時有樣嘢唔使再俾澳門騎住。
踏入05年，港股好友俾淡友㩒住嚟砌，直至上個禮拜先至有些少起色，恒指全周反彈169點，為港股帶來轉機。
可惜上周五美股唔多配合，杜指下跌40點，收10427，去年11月至今營造的複式頭肩頂形態，右肩亦已差不多成形，如果稍後大幅插穿頸線10350水平，杜指頭肩頂形態將確認，量度跌幅可見9900水平。
睇見外圍美股走勢唔多好，趙飛雲對港股短期走勢亦不樂觀，恒指本周估計仍在13780-13320橫行區內上落，就算破頂而上，料亦不能突破50日線13905阻力。暫時仍按上周部署，候港股反彈近上述兩個阻力位不破，伺機買Put輪短炒。
恒指Put輪中，整體上以3581較可取，行使價13600，5月30日到期，溢價4.8%，槓桿率22.4倍，有效11.2倍，引伸波幅18.2%。上周五收0.122元，跌3.9%。
若見恒指升至13800-13900區域不破，可買入3518短炒，食胡位13320-13340水平。另方面，買入後若恒指升破50日線，3581須止蝕。
趙飛雲