自從濠賭股唔好玩之後，小初發覺愈嚟愈多人轉去炒有質素的工業股，行得最快當然係芬佬，而唔少散戶亦跟住轉軚，雖然炒工業股冇濠賭股咁刺激，賺錢幅度冇咁大，但起碼公司業績有數計，風險冇咁高。
經紀黃話，興利集團（114）亦係近期多咗人睇嘅工業股，公司一向低調，但生意瓣數唔少，有時計、家庭用品、玩具禮品，以及電腦磁頭。
興利去年12月中公布中期業績，盈利上升58％，有成3570萬元，原因就係時計生意好掂。興利的時計產品主要銷往英美，但據講有意思打開東南亞市場，公司向證券界推介時，亦不忘以此為賣點。
興利上周五跌1.2%，收0.83元，現價往績PE8.2倍，息率6厘，據講下半年定單同付運仍然堅挺，所以應該有得諗。
另外，經紀黃又重提早前推介過的泰興光學（389），佢話早排大股東密密增持，已經覺得有啲嘢，原來除咗大股東外，芬佬亦唔執輸增持，所以股價愈升愈高。泰興上周五升8.85％，收6.15元。
慕容小初