上周係1月份最醒嘅1周，5日計埋恒指有169點進帳，其中周二至周五連升4日，4日升幅263點。臘鼓頻催，個市賸番6日半，猴年就埋單。上周五，港股交投縮到125.9億元，減少54.8億元。跟住幾日，個市交投會再靜啲。
恒指P輪：認為個市連升4日會有短期回吐，短炒三朝兩日，揀恒指P輪埋手，有3543與4662兩件可以考慮。
3543喺6月底夠鐘，輪價18.5仙，溢價3.9%，槓桿率9.8倍（有效6.6倍），引伸波幅22.1%。4662喺5月底到期，輪價14.4仙，溢價5.1%，槓桿率21.1倍（有效10.5倍），引伸波幅19.4%。或者有啲揸咗股票好倉嘅股民，見過年咁多日休市，心掛掛，驚外圍唔知發生乜嘢事，驚雞年紅盤死火，但又唔想放貨，亦可以揸些少恒指P輪戥住，萬一股票減價，喺P輪身上贏番啲。
恒指P輪4516與4433槓桿率大啲，搏殺味道濃啲，但壽命唔長，3月尾到期。放完年假返嚟，已經係2月14日，而2月份又係短月，得28日，心理上距3月尾到期日又近好多，容易輸溢價，值博率低過遠期P輪。
恒指C輪：如果猴年最後幾日個市散落去，博雞年開市有技術反彈，低位揸恒指C輪，有兩件可以諗吓。
3700喺6月尾夠鐘，輪價18仙，溢價2.6%，槓桿率16.9倍（有效10.1倍），引伸波幅18.9%。3505喺5月尾到期，輪價9.9仙，溢價2.8%，槓桿率32.1倍（有效15.4倍），引伸波幅15.0%。
千祈咪恒指C輪與P輪兩邊一齊揸，蝕溢價，咁做輸咗9成。
章盛