朗拿度上個星期六以探病為由返巴西，無踢噚晚皇家馬德里作客紐文西亞場西甲波。各大傳媒就「哨牙仔」返國作出多種猜測；我哋香港球迷，當然希望佢今日會如期返西班牙、唔會有任何枝節——千祈唔好影響到佢來港賀歲呀！
就朗拿度今次返國原因，眾說紛紜，佢經理人就話朗拿度其中一位親人病重，所以要趕返去探病。不過當事人一日唔走出嚟講，揣測始終多，包括傳佢返國係因為佢哥哥被綁架、同皇馬教練盧森貝高不和要「唞氣」、純粹返國搞結婚細節。點都好，假如佢喺西班牙時間星期一晚返唔到馬德里向皇馬報道，就代表事態唔尋常，香港球迷當然唔希望佢有咩特別事故。
講開皇馬真係多新聞，例如日前傳出費高同沙加度練波時幾乎大打出手，好彩教練盧森貝高同其他球員及時調停。假如消息屬實，盧森貝高真係有排頭痛。
乙組仔伊奧維前日響足總盃作客輸畀查爾頓二比三。相信球迷都知伊奧維中場保羅泰利係車路士名將泰利嘅哥哥，而泰利就做中間人，令伊奧維賽前可以借用車路士練習場。據講泰利響雨天照樣陪哥哥隊波操，手足情深。伊奧維出局，但保羅泰利有波入，總算無令弟弟失望。
今季直播荷甲波嘅三色台，唔知係咪同熱門無乜緣份，直播親嘅聯賽，唔係開呢個聯賽比較冷門嘅入球「細」，就係熱門嗰隊死火！前晚又爆出飛燕諾作客和川迪○比○；計埋今季燕豪芬主場被打破不敗身輸畀洛達○比二，重有作客和烏德勒支○比○，等我求大俠下次博下冷都好！
前日阿仙奴贏狼隊場足總盃比賽，亨利曾經趁對方龍門奧基斯開球門球未完成整個動作，就攞到個波射入網，最後被球證判詐胡；賽後有網民覺得以佢星級身份，使乜「紆尊降貴」咁樣博入球？亨利出盡法寶，無非因為○五年踢咗五場波重未「發市」。即管睇佢幾時破到入球荒。
車路士愈踢愈順，而今季「四冠王」特別賠率喺英倫方面開始受到關注，尤其接受投注嘅英倫博彩公司負責人，因為如果「車仔」最終跑出，預計所有英倫博彩公司合計要派彩五百萬鎊（約七千五百萬港元）。我求大俠一定睇實今個月「車仔」對巴塞隆拿兩場歐冠盃大戰啦！