Beyond前晚在紅館演出第三場演唱會，請來達明一派任嘉賓，氣氛熱烈高漲，尾段黃家強及黃貫中等懷念家駒時，黃貫中（Paul）悲從中來，抒發對現今樂壇的不滿，事後還表示有意退出娛樂圈。
組合Beyond聲言今次是樂隊最後一次開演唱會，每晚請來八十年代不同的樂隊任嘉賓，前晚出現的是達明一派，Beyond與達明合唱《十個救火的少年》及《真的愛你》，全場掌聲雷動，黃耀明說：「佢哋話今次係最後一次，我聽到都毛管戙，一定要嚟，不過個世界係圓嘅，我同阿達都成日話最後一次。」明哥又叫歌迷要開心些，Beyond就會再重聚，他又說：「畀啲空間佢哋做自己嘢啦，係好事嚟。」
至懷念家駒的演出項目，家強表示要送《祝你愉快》給家駒，又叫歌迷站立一同致敬，結果全場觀眾站立，場面壯觀，到演唱會尾聲，家強忍着眼淚表示要感謝家駒、世榮及阿Paul與他組Beyond時，阿Paul亦有感而發：「我心情好矛盾，又想家駒喺度，又唔想佢喺度，如果佢見到樂壇咁樣一定唔開心，希望佢去另一個好地方。」
事後阿Paul接受電話訪問，仍然激動，他說：「我講嘅係真心話，自己有心理準備退出娛樂圈，亦唔想同人爭，我退一步或者開心好多，只要fans記得有Beyond就心滿意足。」阿Paul續說：「Beyond入行二十幾年，開過幾次演唱會，加埋出碟，除開每個月搵得幾千蚊，其他人成日話對樂壇有貢獻，有乜貢獻呀？」
阿Paul表示自家駒逝世後出過六張唱片，雖然成績不俗，但撐得好辛苦，他說：「我想休息，或者退居幕後，真係唔想做幕前同做獎門人嗰啲，大家可能今次以後永遠見唔到我，不過我見到啲fans又唔捨得，可能聽日上到台又冇事。」
採訪：胡比 攝影：仇志德
