楊千嬅前晚在廣州天河體育館舉行一場「楊千嬅2005演唱會」，是她在內地的處女個唱。她更罕有地性感，其中一件火紅色低胸衫酥胸半露，實行搏到盡益內地同胞。 記者蔡丹廣州直擊
千嬅前晚在廣州舉行內地的首個個唱，全場九千座位爆滿，父母、妹妹及三姨媽都有到場打氣，又請來梁漢文任嘉賓。
千嬅在場館中間的人群堆中邊唱《楊門女將》邊出場，後面跟着兩位揮動楊字旗的舞蹈員，頗有氣勢，可惜咪高峯失靈，有時沒有聲音，但觀眾反應依然熱烈，更有觀眾攝錄。不過最受觀眾歡迎的，莫過於千嬅除去紅色大衣以火紅色吊帶低胸衫示人，惹得觀眾狂叫，千嬅笑說：「我都唔明，入行十幾年，除衫比唱歌受歡迎。」
後來千嬅欲落台握手，歌迷即蜂擁上前，千嬅即說：「大家唔好推，唔係我就返上台。」結果千嬅沒有握手，只派發贊助商禮品，未唱完一首歌已被拉回台上，免生危險，而台前的欄杆都被推跌。最後千嬅說：「好多人成日話我喊，攞獎開心又喊，其實係自己性格，對好多嘢反應都好直接，只係人哋對我有誤解，係我自己好易觸動到自己。」
事後千嬅在慶功宴上表示，除了在英國的胞弟，家人都有來捧場，她說：「做完今晚，對之後喺台山、番禺同大馬開都有信心，有個潮州廣告商今日都有嚟睇反應，我都想返鄉下唱，好光榮，可能三、四月啦，但到時又可能要拍戲。我都想喺北京同上海開，但要儲好多國語歌。」
提到落台握手中途即返上台，千嬅說：「一早話唔可以握手，係美中不足，我派完禮物一陣就俾人扯番上台，都危險㗎。」提到前晚有觀眾攝錄，千嬅說：「唔怕啦，呢啲係另類成就，香港都出咗DVD，如果佢出老翻我就一萬個唔願意囉。」千嬅本周四三十一歲生日，她表示當日早上要出席鑽石商的活動，可能獲贈大粒鑽石，今年她想舉行生日派對慶祝。
此外，為個唱擔任嘉賓的梁漢文則說：「我都想喺內地破處開演唱會，頭先我唱《愛人》好緊張，晏晝先練咋！」
